08:08:00
Isku aadka wareega sideed dhamaadka koobka Europa League ayaa goor dhow lagu qabtay magaalada Nyon ee dalka Switzerland waxaana ka soo baxay kulan ay dad badani rajeynayeen oo ah in Borussia Dortmund ay wajihi doonto kooxda Liverpool, taasoo la micno ah in Jurgen Klopp uu wajihi doono kooxdiisa hore ee Borussia Dortmund.
Dortmund ayaa wareegii 16ka waxa ay si raaxo leh ku soo martay kooxda Ingariiska ee Tottenham, halka Liverpool ay ka soo talaabsatay kooxda ay cadowga yihiin ee Manchester United, waxaana uu kulankaan yahay midka ugu xiisaha iyo xamaasada badan wareega 8da Europa League.
Macalin Jurgen Klopp oo iska casilay shaqada kooxda Borussia Dortmund dhamaadkii xilli ciyaareedkii hore ayaa haatan fursad u helaya inuu ku laabto Iduna Park isagoo markaan wata kooxda Liverpoo, heesta You Will Never Walk Alone oo ay jamaahiirta labada kooxood isticmaalaan ayaa cod dheer looga qaadi doonaa Anfield iyo Iduna Park.
Kulamada kale ee wareega 8da kooxda reer Portugal ee Braga ayaa ku dhacday kooxda reer Ukraine ee Shakhtar Donestk halka kooxaha Spain ee Atletic Bilbao iyo kooxda koobkaan difaacaneysa ee Sevilla ay isku dhaceen, waxaa iyagana sidoo kale is arkaya kooxaha Villarreal iyo Sparta Prague.
Lugta hore ee wareega 8da Europa League waxa ala ciyaari doonaa 7da bisha April halka lugta labaad la ciyaari doono 14ka bisha April.
No comments
Post a Comment